వీదిశూల విషయంలో విధిగా అప్రమత్తం
వీధిశూల అని వీధి పోటు అని పిలువబడే వీటి విషయంలో చాలా చాలా అప్రమత్తంగా ఉండాలి. స్థలం తీసుకునే తరుణంలోనే ఈ వీధిపోట్లును గుర్తించాలి. వీధి ఫలితాలు తెల్సుకుని స్థలాన్ని కొనడం చేయాలి. మన స్థలానికి ఎదురుగా వీధి ఉంటే దానిని వీధిపోటు అంటాము. ఏ వీధిపోటు ఎలాంటి ఫలితాలనిస్తుందో సవివరంగా తెల్సుకుందాం.
తూర్పు ఈశాన్య వీధిపోటు : ఇక్కడి చిత్రాన్ని గమనిస్తే చాలు.... ఈ వీధిపోటు ఎలా ఉంటుందో మీరు సులభంగా అర్ధం చేసుకోగల్గుతారు. తూర్పు ఈశాన్య వీధిపోటు ఆ గృహంలో నివశించే పురుషులపై ప్రభావం చూపుతుంది. ఇంటా బయటా వీరిదే పైచేయి అన్నట్లుంటుంది వీరి పరిస్థితి. ఎక్కడ ఉన్నా ఏ పని చేస్తున్నా మంచి గుర్తింపు, మన్నన వీరికి లభిస్తాయి. సమాజంలో మంచి గౌరవ ప్రతిష్ఠలు పొందగల్గుతారు. ఇది శుభప్రదమైన వీధిశూలే. ఇలాంటి వీధిపోటు ఉన్న స్థలంలో గృహ నిర్మాణం ఆమోద యోగ్యమే.
ఉత్తర ఈశాన్యం వీధిపోటు : ఉత్తర ఈశాన్యం వీధిపోటు... ఎంతో శుభప్రదం, లాభదాయకం, ఇంట సిరులు కురిపించే వీధిపోటు ఇది. ఈ ఇంట ధనమే కాదు, ఆరోగ్యం కూడా దండిగా ఉంటుంది. ఈ ఇంటో నివశించే దంపతులు ఎంతో అన్యోన్యంగా దాంపత్యాన్ని సాగిస్తారు. కుటుంబంలో సభ్యుల నడుమ మమతానురాగాలు పెనవేసుకుంటాయి. ఇంటా బయటా స్త్రీ పురుష బేధం లేకుండా ఈ ఇంట నివసించే వారికి మంచి పేరు ప్రతిష్ఠలు లభిస్తాయి. ఇలా ఉత్తర ఈశాన్యం వీధిపోటు ఉన్న స్థలం లభిస్తే... వెయ్యి రూపాయలు అదనంగా చెల్లించి అయినా తక్షణం కొనేసుకోండి.
ఉత్తర వాయువ్యం వీధిపోటు : ఈ వీధిపోటు శుభదాయకం కాదు. ముఖ్యంగా ఈ వీధిపోటు ఆ ఇంట నివశించే మహిళలపై ప్రభావం చూపుతుంది. మనశ్శాంతిగా ఉండలేరు. సంసారంలో సుఖ సౌఖ్యాలు కరువవుతాయి. ఆడపిల్లలకు చదువు అబ్బదు. వివాహాల సమయంలో కూడా ఎన్నోచిక్కులు ఎదురవుతాయి. ఇలాంటి స్థలాన్ని కానీ, ఇంటిని కానీ కొనకూడదు.
పశ్చిమ వాయువ్యం వీధిపోటు : పశ్చిమ వాయువ్య దిశలో ఇంటికి ఎదురుగా వీధి ఉన్నట్లయితే దాన్ని పశ్చిమ వాయువ్య వీధిపోటుగా పరిగణించాలి. ఈ వీధిపోటు ఉన్న స్థలం కొనదగినది. గృహ నిర్మాణం చేయదగినది. ఈ వీధిపోటు పురుషులపై సత్ప్రభావం చూపుతుంది. రాజపూజ్యం, గౌరవ ప్రతిష్ఠలు, ఎల్లెడలా ఆధిపత్యం, రాజకీయాలలో నాయకులుగాను త్వరగా ఎదుగుతారు. మట్టి ముట్లుకున్నా బంగారం అన్నట్లుంటుంది ఈ ఇంటి నివశించే పురుషుల పరిస్థితి. ఇలాంటి స్థలాన్ని రెండో ఆలోచన లేకుండా కొనేయాలి.
పశ్చిమ నైఋతి వీధిపోటు : ఈ వీధిపోటు ఆ ఇంట నివశించే పురుషులపై ప్రధానంగా ప్రభావం చూపుతుంది. జీవితం గొర్రెకు తోక బెత్తెడే అన్నట్లుంటుంది. కష్టానికి తగ్గ ఫలితం లభించదు. నిరాశా నిస్పృహలకు గురిచేస్తుంది. మనశ్శాంతిని హరిస్తుంది. జీవితం ఆపజయాల జాతర అన్నట్లు మారుతుంది. ఆపవాదులు, నిందలు, ఈ ఇంట మగవారిని బాధించి వేధిస్తాయి. విజయం చేతికందినట్లే అంది పరాజయాన్ని మిగులుస్తుంది. మగవారి పరిస్థితి ఇలా ఉంటే ఇక ఆ కుటుంబం ఎలా ఉంటుందో మీరే అలోచించండి.
దక్షిణ నైఋతి వీధిపోటు : దక్షిణ నైఋతికి ఎదురుగా వీధి ఉంటే.. దాన్ని దక్షిణ నైఋతి వీధిపోటుగా భావించాలి. ఇలాంటి వీధిపోటు ఉన్న స్థలాన్ని, ఇంటిని కొనకూడదు. ప్రత్యేకించి ఈ వీధిపోటు ప్రభావవం ఆ ఇంట గృహిణిపైన ఉంటుంది. కాపురం కలతల కల్లోలంగా ఉంటుంది. దాంపత్యంలో అనురాగం కొరవడుతుంది. ఇంటి యజమానురాలి ఆరోగ్యం బాగుండదు. ఏ కార్యం తలపెట్టినా ఎదురుతిరుగుతుంది. మనసు ఎప్పుడూ కల్లోల సాగరంలా ఉంటుంది. ఊరకే కృంగిపోతుంటారు. ఇంటా బయటా అవమానాలే.
దక్షిణ ఆగ్నేయ వీధిపోటు : ఇలాంటి వీధిపోటు... ఉన్న స్థలాన్ని, ఇంటినీ నిశ్చింతగా కొనవచ్చు. ఈ ఇంట నివసించేవారు.. ఆనందప్రదమైన జీవితాన్ని అనుభవిస్తారు. డబ్బుకు కొదవే ఉండదు. అలానే ఈ ఇంట నివసించే వారికి ఆరోగ్యానికీ కొదవ ఉండదు. ఎప్పుడూ ఈ ఇల్లు ధన ధాన్యాలతో తులతూగుతుంటుంది. బంధుమిత్రులతో కళకళలాడుతుంటుంది. ఈ ఇంట నివశించే ఆడవారు, ఆడపిల్లల చదువుల్లో సరస్వతుల్లా రాణిస్తారు. మంచి ఉద్యోగాలను పొందగల్గుతారు. మంచి ఖ్యాతి విఖ్యాతులు సొంతం చేసుకుంటారు.
తూర్పు ఆగ్నేయ వీధిపోటు : తూర్పు ఆగ్నేయ దిశలో వీధిపోటు ఉందంటే... ఆ ఇంట నివశించే వారి జీవితం... నిత్యం అల్లకల్లోలం అన్నట్లుంటుంది. జయాలు శూన్యం. అపజయాలు అపారం. జీవితంలో కష్టాలు కోకొల్లలు. సుఖాలు కోటి దివిటీలతో వెతికినా కన్పించవు. మనసు సునామీ నాటి సంద్రంటా ఉంటుంది. వేయి ప్రయత్నాలు చేస్తే 999 విఫలం అన్నట్లుంటుంది జీవితం. అటు వృత్తిలో అయినా, ఇటు వ్యాపారంలో అయినా విజయం ఎండమావే అవుతుంటుంది. తూర్పు ఆగ్నేయ వీధిపోటున్న ఇంటిని, స్థలాన్ని కొనకూడదు.
వీధిపోట్లు పట్ల నిర్లక్ష్యం : వాస్తుశాస్త్రం రీత్యా వీధిపోట్లు విషయంలో చాలాచాలా అప్రమత్తంగా ఉండాలి. సుఖశాంతుల్ని, జీవితంలో సెక్సెస్‌లను మింగేసి... అశాంతిని మిగిలించే వీధిపోట్లు ఉన్నా ఇళ్ళు, స్థలాలు, వ్యాపార దుకాణాలు... వీటికి ఎంత దూరంగా ఉంటే అంత మంచిది. శాస్త్రాన్ని, శాస్త్ర సూచనలను నిర్లక్ష్యం చేసి... కోరి కలతల్ని కొనితెచ్చుకోవలన్నదే మా విన్నపం.
దిక్కులు పెరిగినా, మూలల చెదిరినా కరెక్టు చేసుకోవాల్సిందే...
వాస్తుశాస్త్ర విరుద్ధంగా మూలలు పెరిగిన స్థలాలను వాస్తు నియమాల రీత్యా సరిచేసుకుని అప్పుడు గృహనిర్మాణం చేసుకుంటే.. ఆ ఇల్లు సుఖశాంతుల నిలయం అవుతుంది. పారిజాతపు వనంలా సంతసంతో ప్రకాశిస్తుంది. ఇక పెరిగిన మూలలు వాటిని సరిచేసుకునే విధానం తెల్సుకుందామా?
తూర్పు ఆగ్నేయం : ఈ మూల పెరగడం ఏ మాత్రం క్షేమదాయకం కాదు. ఆ మూలను సరిచేసుకున్నాకనే గృహ నిర్మాణం చేపట్టాలి. పెరిగిన మూలలో వున్న స్థలాన్ని కట్‌చేసి... గృహ నిర్మాణ స్థలంలో కలపకుండా వేరుగా ఉంచాలి. ఈ స్థలాన్ని మొక్కలు పెంచుకునేందుకు ఉపయోగించండే తప్ప... నిత్యం వాడుకునే విధంగా మాత్రం మలచుకోవద్దు. ఇక్కడి చిత్రంలో ఉన్న భాగాన్ని కట్‌చేసి వదిలివేయాలి.
తూర్పు ఈశాన్యం : తూర్పు ఈశాన్యం స్థలం పెరిగితే... తొలగించాల్సిన అవసరం లేదు. ఇలాంటి స్థలం అదృష్టదాయకం. ఆయురారోగ్య ధనధాన్యాభివృద్ధికి నిలయం అవుతుందీ స్థలం. ఎంత అదనపు సొమ్ము చెల్లించి అయినా ఇలాంటి స్థలాన్ని నిశ్చింతగా కానండి.
ఉత్తర ఈశాన్యం : ఇలా ఉత్తర ఈశాన్యం పెరిగి వున్న స్థలాన్ని కూడా మరో ఆలోచన చేయకుండా కొనుక్కోవచ్చు. ఇలా ఉత్తర ఈశాన్యం పెరిగిన స్థలాన్ని కట్‌చేసి తొలగించాల్సిన అవసరం లేదు. నిశ్చింతగా ఉంచుకోవచ్చు. ఈ ప్రదేశంలో బరువైన నిర్మాణాలు చేయకూడదు. ఈ స్థలాన్ని వదిలేస్తేనే వాస్తురీత్యా శుభప్రదం.
ఉత్తర వాయువ్యం : మీరు కొనే స్థలం ఉత్తర వాయువ్యం పెరిగి ఉంటే... పెరిగిన మేర కట్‌చేసి దానిని నిర్మాణాలకు ఏమాత్రం వినియోగించకుండా... మిగిలిన స్థలంలో గృహ నిర్మాణం చేసుకోవాలి.
పశ్చిమ వాయువ్యం: పశ్చిమ వాయువ్యం పెరిగి ఉండడం కూడా వాస్తు శాస్త్ర రీత్యా శుభ సూచకంకాదు. కనుక పశ్చిమ వాయువ్యంలో పెరిగి వున్న స్థలాన్ని కట్‌ చేసి తొలగించి... మిగిలిన స్థలంలో గృహ నిర్మాణం చేయాలి.
పశ్చిమ నైఋతి : పశ్చిమ నైఋతి పెరిగి ఉండటం కూడా వాస్తురీత్యా ఆమోదనీయం కాదు. జాగ్రత్తగా పెరిగిన పశ్చిమ నైఋతీ భాగాన్ని కట్‌చేసి, స్థలాన్ని చతురస్ర లేదా దీర్ఘ చతురస్రాకారంగా తయారు చేసుకుని ఆ స్థలంలో గృహ నిర్మాణం చేయాలి.
దక్షిణ నైఋతి : ఇక్కడి చిత్రాన్ని గమనిస్తే దక్షిణ నైఋతి పెరిగినట్లు అర్ధం అవుతుంది. దక్షిణ నైఋతి పెరిగి ఉండకూడదు. పెరిగిన మేర కట్‌ చేయాల్సిందే. తూర్పు, పడమర భుజాలు సమంగా ఉండేలా చూసుకుని దక్షిణ నైఋతిని కట్‌ చేయాలి.
దక్షిణ ఆగ్నేయం : దక్షిణ ఆగ్నేయం పెరగడం కూడా వాస్తు శాస్త్ర రీత్యా సమ్మతమైన విషయం కాదు. పెరిగిన దక్షిణ ఆగ్నేయాన్ని తప్పకుండా కట్‌చేసి తొలగించాల్సిందే. దక్షిణ ఆగ్నేయం పెరగటం అంటే.. నైఋతి తగ్గటం అన్నమాట. నైఋతి పెరిగినా, తగ్గినా అది శుభప్రదం కాదు.
కొన్ని స్థలాలు.. ఒకమూలే కాకుండా... రెండు మూలలు కూడా పెరిగి ఉంటాయి. వాటిని సరిచేసుకున్నాకనే గృహ నిర్మాణం కావించాలి. ముఖ్యంగా ఇలా మూలలు పెరిగిన వాటిని కరెక్టు చేయకుండా నిర్మాణాలు చేపట్టి ఉంటే.. ఒకవేళ అలాంటి నిర్మాణాలు మీరు కొనుగోలు చేయవలసి వస్తే... ఆ నిర్మాణం గావించబడిన స్థలం.. ఏ మూల పెరిగిందో తెల్సుకోండి. ఒకవేళ ఆ పెరుగుదల అశుభ సూచకం అయినట్లయితే.. ఏ మాత్రం అవకాశం ఉన్నా ఆ మూలలలో అదనంగా ఉన్న స్థలాన్ని కట్‌ చేయడానికి అనువుగా గృహ నిర్మాణం జరిగి ఉంటే... మీరా ఇంటిని కొన్నాక అయినా.. ఇంటి స్థలంలో పెరిగిన భాగాన్ని కట్‌ చేయండి. దాన్ని ఏ మాత్రం వాడుకలో ఉండకుండా పూర్తి జాగ్రత్తలు వహించండి. ఒకవేళ పెరిగిన మూలలు సరిచేసేందుకు వీలుగా గృహ నిర్మాణం లేకపోయినట్లయితే ఆ గృహాన్ని కొనకుండా వదిలేయండి. ఉత్తర ఈశాన్యం, తూర్పు ఈశాన్యం పెరిగి వున్న స్థలాన్ని అలాంటి స్థలంలో నిర్మించబడిన గృహాలను నిశ్చింతగా కొనేయండి.
కాంపౌండ్‌ వాల్‌ నిర్మాణం : ముందుగా వాస్తుపరంగా మన ఇంటి ప్రహారీ ఎలా నిర్మంచుకోవాలో తెల్సుకుందాం. ప్రధానంగా ప్రహారిగోడ ఎత్తు విషయంలో వాస్తు నియమాలు తప్పని సరిగా పాటించాలి. తూర్పు ప్రహారీ గోడ కన్నా ఉత్తరం వైపు ప్రహారీగోడ తప్పకుండా కొంత ఎత్తుగా ఉండాలి. ఉత్తరం ప్రహారీ గోడకన్నా పడమర ప్రహారీగోడ కొంత ఎత్తుగానే ఉండాలి. ఇక పడమర ప్రహారీగోడకన్నా దక్షిణం ప్రహారీగోడ ఇంకొంత ఎత్తుగా ఉండాలి. అన్నింటికన్నా తక్కువ ఎత్తులో తూర్పు ప్రహారీగోడ, అన్నింటికన్నా ఎక్కువ ఎత్తులో దక్షిణ ప్రహారీగోడ ఉండాలి. అలానే తూర్పుకన్నా పడమర... ఉత్తరం కన్నా దక్షిణం ప్రహారి గోడలు పోల్చి చూసినపుడు ఎత్తుగా ఉండి తీరాల్సిందే.
ప్రహారిగోడకు గేట్లు నిర్ణయం : కాంపౌండ్‌ వాల్‌కు గేట్లు అమర్చుకునే విషయంలో వాస్తు చక్కని నియమాలను సూచించింది. ఆ నియమాలకు అనుగుణంగా ప్రహారీగోడకు గేట్లు ఏర్పాటు చేసుకోవాలి. తూర్పు వైపు కాంపౌండ్‌ వాల్‌కు ఎక్కడ గేటు అరేంజ్‌ చేసుకోవాలో ముందుగా తెల్సుకుందాం. సహజంగా దక్షిణం కన్నా ఉత్తరం వైపు గృహ నిర్మాణ సమయంలో ఎక్కువ జాగా వదులుతాం. ఆ స్థలాన్ని కొలచి.. ఖచ్చితంగా దానికి మధ్యలో ఉంచేలా తూర్పు ఈశాన్యంలో కాంపౌండ్‌ వాట్‌ గేటు అమర్చుకోవాలి. ఇది సులవైన విధానం. ఇలానే తూర్పు కాంపౌండ్‌ వాల్‌ పొడవుఉ 9 భాగాలుగా విభజించి, ఉత్తరం నుండి మూడు నాల్గు భాగాలలో కూడా కాంపౌండ్‌ వాట్‌ గేటు అమర్చుకోవచ్చు. అలానే స్థలంలో గృహ నిర్మాణం జరిగినపుడు... ఇంటి సింహద్వారం ఎక్కడయితే వస్తుందో... దానికి ఎదురుగా కూడా తూర్పు కాంపౌండ్‌ వాల్‌కు మరో గేటు... వాహనాల రాకపోకలకు అనువుగా ఏర్పాటు చేసుకోవచ్చు.
ఉత్తరం కాంపౌండ్‌ వాల్‌కు గేట్లు విషయంలో కూడా ఇదే విధానాన్ని అమలు చేయాలి. గృహ నిర్మాణానికి ఉపయోగించే స్థలం పోగా తూర్పున ఎంత స్థలం అయితే వదిలారో... ఆ స్థలానికి మధ్యలో వచ్చేలా ఉత్తర ఈశాన్యంలో గేటు ఏర్పాటు చేసుకోవచ్చు. ఉత్తరం కాంపౌండ్‌ వాల్‌ను 9 భాగాలు చేసి తూర్పు నుండి 3,4 భాగాలలో కూడా గేట్‌ను అమర్చుకోవచ్చు.
పడమర కాంపౌండ్‌ వాల్‌కు గేటు అమర్చుకోవాలంటే కూడా ఇలాంటి నిబంధనలనే పాటించండి. సహజంగా దక్షిణం కన్నా ఉత్తర దిశలో ఇంటిని ఎక్కువ స్థలం వదులుతాము కనుక... ఈ ఖాళీ స్థలానికి మధ్యభాగంలో ఉండేలా పడమర కాంపౌండ్‌ వాల్‌కు పడమర వాయువ్యంలో గేట్‌ అమర్చుకోవాలి. అలానే పడమర కాంపౌండ్‌ వాల్‌ను తొమ్మిది భాగాలుగా విభజించి... మూడు, నాల్గవ భాగాలలో వచ్చేలా గేట్‌ను నిర్మించుకోవచ్చు.
ఇక దక్షిణ కాంపౌండ్‌ వాల్‌ విషయానికొస్తే... గృహ నిర్మాణానికి వినియోగించే స్థలం పోగా తూర్పున ఎలాగూ ఎక్కువ జాగా వదలడం జరిగి తీరుతుంది కనుక... ఈ తూర్పున ఉన్న ఖాళీ స్థలానికి మధ్యలో వచ్చేల దక్షిణ ఆగ్నేయంలో కాంపౌండ్‌వాలో గేటు అమర్చుకోవాలి. అలానే దక్షిణ కాంపౌండ్‌ వాల్‌ను 9 భాగాలుగా విభజించి తూర్పు వైపు నుండి 3,4 భాగాలలో కూడా కాంపౌండ్‌ వాల్‌గేట్‌ను అమర్చుకోవచ్చు.
1. కాంపౌండ్‌ వాల్‌కు అమర్చిన గేట్‌ పరికరాలు ఎప్పుడూ కాంతివంతంగా ఉండాలి. ఈ గేటు ఉన్న ప్రాంతంలో చీకటిగా ఉండకూడదు.
2. గేట్‌ను లోపలకు తెరిచే విధంగా అమర్చుకోవాలన్న నిబంధనను తప్పక పాటించండి.
3. కాంపౌండ్‌వాల్‌ గేటుకు ఎదురుగా కరెంటు స్తంభాలు, కరెంటు ట్రాన్స్‌ఫార్మర్స్‌ ఉండకూడదు.
4. కాంపౌండ్‌వాల్‌ గేటుకు ఎదురుగా చెట్లు ఉండడం, గోతులు, గుట్టలు ఉండడం, పాడుబడిన ఇళ్ళు ఉండడం కూడా వాస్తుశాస్త్ర విరుద్ధమే.
5. కాంపౌండ్‌వాల్‌ గేటు ఇంటి ప్రధాన సింహద్వారం కన్నా తక్కువ ఎత్తులో ఉండి తీరాలి. ఈ నిబంధనను కూడా విధిగా పాటిచాలి.
6. కాంపౌండ్‌వాల్‌ గేటుకు ఎదురుగా చెత్తాచెదారం కుప్పలు, చెత్త కుండీలు, మురికినీరు నిల్వ ఉండడం వంటివి లేకుండా తప్పక జాగ్రత్తలు తీసుకోవాలి.
7. కాంపౌండ్‌వాల్‌కు అమర్చే గేటు ఇంట్లోని అన్ని తలుపుల కన్నా స్ట్రాంగ్‌గా, హెవీగా, పెద్దదిగా ఉండాలి.
8. కాంపౌండ్‌వాల్‌ గేటు తీసే సమయంలో వేసే సమయంలో శబ్దం చేయకూడదు.
9. మెయిన్‌గేట్‌కు ఎదురుగా దేవాలయం ఉండకూడదు
